La Carlotta

La Carlotta, Napoli, A spese de lo Mpressario, 1726

a cura di Mariapia Giardullo

paratesto ATTO PRIMO ATTO SECONDO ATTO TERZO Apparato

LA CARLOTTA

Commeddeja de lo Segnore Bernardo Saddumene da recetarese a lo Tiatro de li Sciorentine, nchesta Primmavera de lo 1726 dedecata a l’Accellentissemo Segnore Conte Alberto D’Althann Degnissemo Nepote de So Amenzia lo Segnore Cardenale Michele Federico d’Althann Vecerré, e Capetanio Generale ’n chisto Regno.

A Napole MDCCXXVI. A spese de lo Mpressario.

Accellentiss. Segnore.

Volenno sta Sia Carlotta mia ch’e na baggiana fa na comparza mprubbeco a sto bello Paese nuosto, desidera avere primma la protezzione de V. Acc., e dovenno venire a piede vuoste p’addimannarvela, io ll’aggio vestuta quanto cchiù spansiosamente aggio potuto; meglio dell’aute sore soje; ma perché mo’ non saccio si pe la nausea de lo buono, si pe lo troppo buon gusto, o si pe la mancanza de li denare, non se sa comme contentare a tutte li Paesane, aggio paura che co tutte le spese che nc’aggio fatto pe farela comparire, puro sarrà retagliata cchiù dell’aute, perché la mmidia cresce addo’ s’avanza lo mmereto. Che perrò ve suppreco Signore a pigliarene le parte particolarmente pe la modestia che tene, che mmereta godere la bella presenzia de lo Gnore Zio Vuosto porzì, che creo ca osservannola cossì ricca, e onestamente adornata se degnarrà de darele cchiù de n’occhiatella: chesto è chello che sopra ogne cosa desidero e, pregannove a perdonareme l’ardire, che m’aggio pigliato, resto co tutto l’ossequio, e venerazione, dichiarannome sempe.

De V. Acc.

Devotiss, e Ossequiosiss. Serv.

Giovanne Crisci.

Argomiento.

Lo Barone Marmi de la Cetà de lo Vasto trovannose a Venezia pe cierte negozie suoje le fuje scritto ca lo primmo figlio sujo chiammato Aurelio se nn’era juto a Napole a fare lo dessutele, e ca steva p’appurà lo matremmonio, co na giovane chiammata Felice figlia de na Vecchia Vedola, ma nferiore a isso de connezione; pe la quale cosa lo Patre lo mannaje a chiammare. Isso che se trovava nnammorato de Felice, dette parola a chesta de matremmonio, e ghiette a trovà lo Patre: se trattenne llà cchiù de n’anno, e nfra chisto tiempo lo Barone trattaje de nzorarelo a Napole co Carlotta figlia de Silvano Federici; e appurato che fuje lo matremmonio le facette na remesta de cincomilia ducate, nfacce a Silvano, e lettera dechiarannolo p’Aurelio, e ne l’abbiaje: Arrivato a Roma trovaje gran folla a l’Alloggiamiento, e le convenne dormire dinto a la Cammera co n’auto gentelommo de Sorriento, chiammato Casimiro, lo quale puro tornava a Napole: se dette lo caso, che le balice de sti duje giuvene fossero tanto simmele, che la matina de notte volennose partire Casimiro, lo Creato sujo pegliaje ncagno de la Valice de lo Patrone, chella d’Aurelio, e se nne jettero: Arrevate la sera a Capua, aprenno Casemiro la Valice, e conoscenno lo sbaglio de lo cagnamiento fatto se servette de l’accasione, e lo juorno appriesso venne a Napole, e presentaje la sera le lettere, co la remessa a Silvano, facennose credere, e chiammare Aurelio Marmi. Aurelio però essennose addonato isso puro la matina, ca ll’era stata pigliata la Valice, pigliaje le poste pe Napole, e arrevaje la sera de lo juorno appriesso ncasa de Silvano, e trovaje non sulo, ca lo Casimiro aveva già data la lettera a lo Viecchio; ma che chella Felice, che isso avea prommiso de sposarese, se trovava ncasa de Silvano, chella sera a la conversazione, e cca se dà prencipio a la rappresentazione de la Favola.

PERSONAGGI

SILVANO FEDERICI gentelommo Viecchio ricco Patre de Carlotta, e nnammorato de Bettina.

CARLOTTA Figlia soja, che se nnammora de Aurelio.

La Segnora Giacommina Ferrari.

AURELIO Gentelommo destenato marito de Carlotta.

La Segnora Laura Borghesi.

FELICE nnammorata de Aurelio

La Sia Poleta Costa.

CASIMIRO creduto Aurelio gentelommo de Sorriento

La Segnora Antonia Colasanti.

BETTINA giovane allegra vecina de Carlotta.

La Segnora Mariuccia Monti.

LIVIA Vecchia burlera.

Lo Signore D. Simone de Farco.

MACCHIONE Servetore grazejuso de Silvano, e nnammorato de Bettina.

Lo Segnore Geronimo Piano.

SATIRO

La Scena se fegne Napole.

Museca de lo Segnore Pietro Auletta Masto de Cappella de lo Seg. Prencepe de Belvedere.

Mutaziune de Scene.

A ll’Atto Primmo.

Galleria granne tutta allummata co lampiere mmiezo ntiempo de notte, co buffettine dove starranno jocanno li Personagge, ed autre forastiere venute a la conversazione.

Anticammera.

A ll’ Atto Secunno.

Vosco de l’Astrune, Padeglione da na parte, Ponte, co sciummo, sott’a na Collina, da dove scennaranno li Personagge accompagnate da gran numero de Cacciature, e stromiente de sciato, pe dare la gran Caccia a lo vosco.

Parte Deliziosa de lo Vosco.

All’Atto Terzo.

Marina de Posileco, co Palazzo magnifeco da na parte, da ll’auta promontorio: E Bregantino granne a mmaro, da dove sbarcano tutte li perzonagge: appriesso, Galeotta Turchesca, da dove sbarcarranno gran quantetà de More, co sciabbole mmano.

Tutte li vierze segnate co sti signe ,, non se cantano.