Lo mbruoglio d'ammore

Lo mbruoglio d'ammore, Velletri, s.e., 1717

a cura di Stefania Napolitano

paratesto ATTO PRIMO ATTO SECONDO ATTO TERZO Apparato

LO MBRUOGLIO D’AMMORE

Commeddia d’Aniello Piscopo posta ’mmuseca da Michele Farco addedecata a so ’zzellenza lo Segnore Conte Verrico de Daun Prencepe de Tiano &c. Vecerré, e Capetanio Gennerale de sta Cetà, e Regno de Napole. Da rappresentarese a lo Treato de li Sciorentine inchist’Anno 1717.

A Velletri 1717.Co llecienzeia de li Soperiure. Se venne sotto la Nfermaria de S. M. la Nova, e a la Fontana Medina.

AZZELLENTISSEMO SEGNORE.

Ali piede de V. Azzellenza, c’hà saputo, e sape co la spata de lo valore, e de la Jostizia tagliare li mbruoglie cchiù nodecuse, che se fanno ntiempo de guerra, e de pace, comme nfra ll’aute s’è bisto a Torino, a Gajeta, &c. e mo’ vedimmo a la jornata (Beneditto sia Dio) a sta Cetate, e sto Regno de Napole; a li piede de V. Azzellenza, dico, appresento sto MBRUOGLIO d’AMMORE, e non pe sopprecareve, che ve degnassevo darece na botta pe scioglierlo; ca sarria na gran pazzia cercareve chesto ngrazia, pocca la spata d’Alesantro serve pe tagliare le nodeca Gordiane, e no chelle che fanno li peccerille a non capo de filo. Ma ve l’appresento schitto, azzocché Bost’Azzellenza se faccia na resata de le ghioje, che fanno cert’aggentarelle de Napole, che se mbrogliano, e sbrogliano a gusto loro, senza che nce metta mano null’ommo buono. Segnore, me piglio st’ardire (pecché site tanto benegno) de sopprecareve a tenerele mente no poco, pe bedere comme se nfrettoleano nfra de lloro, che pareno tanta surece ntossecate, e pollecine dinto la stoppa, ch’è na cosa coriosa, comme nn’esceno a luce; e sto ppoco de tiempo, che nce perdarrite, ve servarrà pe resciatare no tantillo da tant’apprecatione, che ve tene cosuto a filo duppio a lo buono covierno nuosto. E si carcuno se maravigliasse de vedereve spassà co sto Mbruoglio, io le diraggio a nomme de V. Azzellenza chello, che decette no cierto RRe a no Vassallo sujo Masauto, che se maravigliava de vederelo pazzià co no peccerillo, che ll’era figlio; isso le decette: Tu non saje, che bo’ dire Ammore de Patre: Accossì dirraggio io puro a chisse: Vuje non sapite ca S. Azzellenza tene sto Puopolo comme le fosse figlio, e perzò s’è recalato a bederelo pazziare. Mo’ che mme trovo a li piede de V. Azzellenza, uh quanta cose deciarria, si havesse perduto la descrezzione; ma pecché saccio ca è mala creanza nfettà l’arecchie de chiacchiare a chi sta penzanno pe la salute, e lo bene prubbeco; pe cchesso me sto zitto, e ve vaso li piede che scarpisano la Mmidia, e la Fortuna, dechiarannome nzi’ a no pezzechillo de cennere.

De V. Azzellenza

Omeliss. Devotiss, ed Obbregatiss. Schiavo

Savatore Toro.

Argomiento.

Tonno Pertuso Cetrangolaro, nato a Majure, ma cresciuto, e nzorato a Napole, tornanno da lo Paese sujo (addo’ era juto pe quatto juorne) co la Mogliere, e no figlio de duje anne, a le Bbucche de Crapa, avette la caccia da no Bregantino de Turche, e pe sarvarese mmestieno nterra a lo Chiano de Sorriento; E Tonno co lo figlio mbraccio se nne fojette co la mogliere, e non potenno assarpà co ll’aute pe lo pisemo, e la paura lassaje lo figlio nterra, e se sarvaje. Arrivajeno li Turche, che le stevano a la noce de lo cuollo, e se pigliajeno lo fegliulo, e la robba, affonnajeno la varca, e se la felajeno; Ma quanno fujeno a la larga, se ncontrajeno co la felluca de Guardia, co n’autra, che ghieva de conserva, se pelejajeno nfra de lloro, e po scappajeno, ma restaje lo fegliuolo mmano a Fonzo Fajenzaro de Vietre, che se trovava ncoppa a na felluca de chelle, lo quale se lo crescette pe figlio, e le mettette nomme Luccio, e morenno le lassaje le robbecelle soje. Muorto Fonzo, Luccio se nne passaje a Napole a lo Burgo de lo Rito, e llà se nnammoraje de Cecella figlia de Tonno, e sore soja non canosciuta, da la quale isso puro era ammato, si mbe’ appriesso se nce mese mmiezo lo cano nigro de la gelosia. Dopo mute azzediente, Cecella fojennosenne pe desperata, se ncontra co Luccio, che se la porta a la casa, addove ntra lo descurzo, sentenno, ca essa aveva perzo no frate peccerillo mmano de Turche, confrontanno li signe, e contrasigne, se trovano frate, e sore, e soccede tutto chello, che lejarraje dint’a la Commeddeia.

Sacce, ca l’Autore crede sulo chello, che deve credere no vero Crestejano, si mbe’ s’è servuto de qua parola Poeteca, comm’à dicere, sciorta, destino, &c.

Le Pperzune de la Commeddia.

TONNO PERTUSO, Cetrancolaro, viecchio allesenuto.

ZEZA PALLACCA mogliere soja, femmena baggiana.

Lo Sio Semmuono Farco.

CECELLA figlia loro, nnammorata de Luccio.

La Sia Chiara Agnelli.

LUCCIO, Fajenzaro, nnammorato de Cecella, che fegne ammà Norella.

Lo Sio Dommineco Francescone Locchesino.

NORELLA, sore de Titta, nnamorata de Luccio.

La Sia Anna Maria Monti.

TITTA, Molenaro, nnammorato de Cecella.

Lo Sio Nicola Recchezza.

CIOMMO SCAJENZA, pierde jornata, che fa lo smanecatore.

Lo Sio Jacovo d’Ambrosio.

MUSSASCIUTTO, guarzone de Tonno, allopato a la coscia.

Lo Sio Nicola Losi.

La Scena se fegne a lo Ponte de la Matalena de Napole.

Addo’ stace sta stelluccia * vo’ dire, ca chelle pparole se diceno de bbanna.