La mogliere fedele

La mogliere fedele, Napoli, A spese de lo Mpresario, 1724

a cura di Emanuela Esposito

paratesto Prologo ATTO PRIMO ATTO SECONDO ATTO TERZO Apparato

ATTO II

SCENA PRIMMA

TITTA, e NTREANA pe strada.

TITTA

645

A tte che te ne pare

De chello, che m’hà ditto Cartafauza?

NTREANA

Robba sarria de ne fa na sauza;

Ma tu che nne vuo’ fare?

Lo ppeo sarrà lo ssujo; de pare tuoje

650

Nce ne so’ poco a Napole?

TITTA

Ed io mo’ co sse trapole

M’haggio da fa borlare? E no mme scanno.

NTREANA

Tu non faje niente, ed haje quarche malanno.

TITTA

A sto malanno nce starrà cchiù d’uno.

655

E nfra ll’aute Fonzillo,

Che me fa de l’amico.

NTREANA

E che t’ha fatto?

TITTA

Isso havarrà cacciata sta boscia,

Ca moglierema è biva

Pe ncantareme Lella, e si è stato isso,

660

Che me pozz’affocà mmiez’a sto mare

Si llà proprio no ll’haggio da scannare.

NTREANA

Chist’è ghiodizio tujo tremmolario,

Ca chillo n’è nnozente, ed io lo ssaccio.

TITTA

C’haje stodiato quarche calannario?

NTREANA

665

Vi’ ca tu pe sospetto faje qua danno;

O muore, o vaje presone, e perderraje

Lella, e l’amico; fa comme dich’io,

Si tu te vuo’ nzorare,

Te donco la Commare.

TITTA

E puro lloco

670

Ntrea’ no cchiù de chesto,

Aiutamm’addo’ voglio.

NTREANA

E che bò fare?

TITTA

Me voglio vestì schiavo pe saglire,

Co la scusa de vennere, addo Lella.

NTREANA

E perché?

TITTA

Pe basarla; e nch’è basata

675

Hà da essere mia.

NTREANA

Bona pensata.

Non ce perdere tiempo (vuo’ sta frisco.)

TITTA

Saglietenne addo Lella; nche me siente,

Famme saglire ncoppa, o falla scennere.

NTREANA

No mmuo’ auto, che chesto,

680

La cosa è fatta, statte allegramente.

TITTA

C’alliegro voglio sta nfra sti tormiente.

È n’ancunia sto core,

Dove amore, e Gelosia

Fanno comme a dduie ferrare,

685

A chi dare cchiù nce pò.

Mente chillo dà na botta,

Asseconna chest’Arpia,

E lo scuro, che sta sotta,

Pe la stizza fuoco sghizza,

690

E se torce addo’ no mmo’.

SCENA II

NTREANA, e CIULLA.

NTREANA

M’è benuta jocata già la palla.

Aje commare, comma’.

CIULLA

Che nc’è Ntreana?

NTREANA

Spaparanza sto core; sient’apprimmo

La nova, che te porto.

CIULLA

È nova bona?

NTREANA

695

Haggio tanto mpecato,

Che già lo matrimonio s’è guastato.

CIULLA

Lo Cielo ce lo rrenna; comm’haje fatto?

NTREANA

Vasta po te ddico; pe mo’ sacce,

Ca Patro’ Mmeo mmarita Lella a Fonzo,

700

Nche sa ca tu si’ biva.

CIULLA

Oh ca lo chianto mio llà ncoppa arriva.

NTREANA

Nc’è n’auta cosa mo’, che nce pò dare

N’auto ajuto cchiù gruosso.

CIULLA

Ed è?

NTREANA

Mariteto se vo’ fegnere Schiavo

705

Pe ghì a basare Lella.

CIULLA

Ah negramene,

E chisso chiamm’ajuto? Si lo fface,

Se l’ha da nguadiare, o pure è acciso;

E io pe lo sarvare,

Abbesogna, che mora.

NTREANA

Che si’ pazza?

710

Jettate ncuoll’a mmene,

Ca te faccio vedè le ccontramene.

CIULLA

Eccome ccane, vi’, che buo’, che faccia.

NTREANA

Va miettete a la mpressa lo vestito,

C’ajere t’abboscaje.

CIULLA

Pe, che fine?

NTREANA

715

Mo’ torno, e te lo ddico; mo’, che trase

Manname cca Tenzella.

CIULLA

Ma, che serve

Sto bestirme de Zingara?

NTREANA

Vattenne,

No me fa perde tiempo, po parlammo.

CIULLA

Vi’ ca nuje la sgarrammo.

NTREANA

Oh mo’ si’ troppo.

720

Va te vieste, te dico.

CIULLA

Oddio, ca tu me miette a quarche ntrico.

NTREANA

Vi’ comm’è pettemosa?

CIULLA

Jammoncenne;

Già sonco desperata,

L’arresecarse sia la meglio strata.

725

Chi cade dint’all’acqua

S’aiuta comme pò,

E nzi’ che non se stracqua,

Non se sconfida no

Poterene scampà.

730

Cchiù bote s’è beduto

No povero malato,

Che mente è desperato

Lo sana, e le dà aiuto

N’arrore, ch’isso fa.

SCENA III

NTREANA, e po TENZELLA.

NTREANA

735

La paura, che tenco

Che non se scopra lo designo mio,

No me l’hà fatto di’ nnanze lo tiempo,

Azzò, che non perdesse la fatica;

Ma chesta quanto trica?

TENZELLA

740

Mamma, che buoie.

NTREANA

Siente cca Tenzella;

No mmoglio, ch’iesce a chiazza.

TENZELLA

Pe che fine?

NTREANA

Ca già si’ fatta grossa.

TENZELLA

Uh che freddura?

Ajere nc’è so’ sciuta, e mo’ non pozzo?

Che so’ fuorze cresciuta quarche Canna?

745

No, no, quarcosa nc’è, vallo decenno.

NTREANA

Non haggio, che te di’, no mmoglio, ch’iesce.

TENZELLA

Ma sta cosa perché cossì de botta?

NTREANA

Schiavo sapere, che portare sotta.

TENZELLA

E comm’haggio da dire a chi me spia,

750

Perché stonco nzerrata?

NTREANA

Dille ca staje malata.

TENZELLA

Arrasso sia,

Pozza schiattà lo miedeco, che ddice?

Vide che pezza fraceta!

NTREANA

E tu sona.

TENZELLA

Comme lo pozzo dire si sto bona?

NTREANA

755

Tu propio la vuo’ vencere; decimmolo:

V’havimmo mmaretata.

TENZELLA

Mmaretata, e co chi?

NTREANA

Co Patro’ Mmeo.

TENZELLA

Aquavita, e cafeo.

NTREANA

E che bo’ di’ chesto?

TENZELLA

Da quant’ha t’è benuto sto penziero?

NTREANA

760

M’è benuto mo’ nnante.

TENZELLA

E mo’ te passa;

Chi t’hà data sta scola?

No sacco d’ossa rotte a na fegliola?

NTREANA

Che sacco d’ossa rotte, staje mpazzuta?

N’ommo fatto, n’ommo de jodizio.

TENZELLA

765

Se faccia mastro giorgio, si ha jodizio.

NTREANA

Sta buono de salute, e stace commeto.

TENZELLA

Gnorsì, gnorsì; ma io me nce trovo scommeta.

NTREANA

Che buo’ lo sbarvatiello? che ndì iorne

Se ioca quanto tene pe sse cchiazze,

770

E pe pane te sazia de mazze?

Chisto t’haje da pegliare.

TENZELLA

Io no lo voglio.

NTREANA

Te lo ffaccio volere, anca te pesa.

TENZELLA

Di’ che se corca, ca la manta è stesa.

Si’ becchia, e non saie chesto,

775

Ca lo marito a forza

E na cauzetta stretta,

Che non se pò cauzà;

E si la vuo’ tirà,

Tanno se straccia.

780

Mparate st’auto riesto,

Lo core non se sforza,

Lo genio non s’appretta

E chi lo vo’ apprettà

Scagno de farse amà,

785

Cchiù se descaccia.

SCENA IV

NTREANA sola.

NTREANA

Veramente ha raggione la scuressa,

Ch’è troppo figliolella, e Patrommeo

È no poco stantivo; che buo’ fare,

Havere non se pò grieco, e cappucce,

790

Chillo sta ricco assaie,

Nc’è da magnà? so’ niente ll’aute guaie

Le sarrà forte apprimmo,

Ma po nce face ll’uso

La conocchia s’acconcia ad ogne fuso.

795

Lo vetiello teneriello

Schifa assaie lo iugo tuosto,

Ma nché sotta nce l’haie puosto

Se l’accolla chiano, chiano

E s’ausa a lo terà.

800

Accussì fa na zetella

Quanno s’ha da mmaretare,

Nullo viecchio vo’ pegliare

Ma nc’ha stesa la manella,

Lo marito, è saporito,

805

E lo sape accarezzà.

SCENA V

MEO, e FONZO pe strada.

MEO

La facenna è concrusa; nché Ntreana

Me fa vedere Ciulla, te do Lella.

FONZILLO

Zi Meo si me vuo’ vivo,

Non te cagnare de penziero.

MEO

Bravo?

810

E che so’ peccerillo, o Sagliemmanco

Lo vide sto mostaccio?

Chisto te dà parola,

Si no l’ha Titta, è toja la fegliola.

FONZILLO

Titta no la pò havè; ma chi lo ssape,

815

Che mbroglia maie pò fare,

Pe non farmela dare?

MEO

E che Patrone de llo sanco mio?

Si non s’attenne a fa li fatte suoie,

Nc’è la jostizia, e tenco bone mane.

FONZILLO

820

Lo ssaccio, e manco io so’ quarche pacchiano.

MEO

Ora parlammo d’auto; tu staie lesto,

Pe la recatta?

FONZILLO

E comme aggio sparmata

Na felluca sottile co seie uommene

Che sonco seie giagante.

MEO

Eh Fonzo siente,

825

Io spero a la fortuna, e cchiù ad Amore,

Ca lo venco sso Palio; ma si ncaso

Lo vince tune, m’haie da fa na grazia.

FONZILLO

Patrone de la vita, che borrisse.

MEO

Vorria, che me lo disse

830

Ca lo vorria donare a Tenza mia.

FONZILLO

Comme vole ossoria; si be’ voleva

Appresentarlo a Lella,

Ma le do n’auta cosa, che’è cchiù bella.

MEO

Sì, famme sto piacere,

835

Vorria fa na fenezza a stà fegliola;

Ca me la nguadio; e boglio,

Che faccia a certe sninfie cannavola.

FONZILLO

Tu staje bravo afficcato a ssa quagliozza.

MEO

Sine, si Fonzo mio, ch’è troppo bella,

840

E me face piglià la tarantella.

Si stonco scetato,

Tenzella me frusta,

Si stonco corcato,

Tenzella me susta,

845

Si dormo, me sceta

Ca nzuonno me vene,

M’afferra, me tene,

E comm’a copeta

Me face squaglià.

850

Si vevo, si magno,

Me sento nnozare

Si pesco, me fragno,

Ca dinto a sto mare

Non c’è sta serena

855

E quanno sto sulo,

Me piglia la pena,

O comme a figliulo

Me metto a zumpà.

SCENA VI

FONZO, e LELLA dallo barcone.

FONZILLO

E ba ca l’ha pigliato lo Calappio

860

Sto viecchio, e se n’abbia, co chisse butte

Amore nzomma fa scherchiare a tutte.

Ma vedo Lella, oddio, che luna è chesta.

LELLA

Ora vi’ che maretto,

Me fanno ncapo sti penziere? Ah Titta

865

Non t’havisse maie visto, e conosciuto,

Ca lo repuoso n’havarria perduto.

FONZILLO

Sia Lella ve so’ schiavo.

LELLA

Addio si Fonzo.

FONZILLO

Ve veo malanconeca, c’havite?

LELLA

Non sempe se pò sta de na manera;

870

Me sento poco bona co la capo.

FONZILLO

E cchiù priesto lo core, che ve dole.

LELLA

Lo core? E pecché fine.

FONZILLO

Di’ se sole,

Ca pe sciccà no chiovo rebattuto,

Nce vo’ fatica assaje, ca nc’è arrozzuto.

LELLA

875

Vuie parlate pe Titta, ma sgarrate,

Da quant’ha, ch’è zompato da sto pietto,

Sa che bravo martiello è lo despietto.

FONZILLO

Si è lo vero, sarrimmo tutte e duie

Felice, e consolate.

LELLA

880

A chesto che nc’entrate.

FONZILLO

C’entro assaie, zi Meo me v’hà promessa,

E mo’ simmo accossì na cosa stessa.

LELLA

Me v’ha promessa già.

FONZILLO

Che ve dispiace?

LELLA

Chi chiamma? mo’ mmo’ venco.

885

Si Fonzo collecienzia, so’ chiammata.

FONZILLO

Attennite. Oh fortuna, e pure chesto?

Mente stonco a lo meglio de parlare,

Me viene a sconcecare.

Ma chi lo ssa si non l’ha fatto apposta

890

Pe spezzà lo descurzo, ch’è mpontata

Sentenno, ca lo zio me l’hà promessa.

Fosse sbotata? c’auta storia è chessa?

Si mbe’ scompe la tempesta,

Puro mormora lo mare,

895

Accossì me pare chesta,

Che co mmico voglia fa.

Pe nzi’ a mo’ m’ha tormentato

Co lo sdigno, e lo despietto,

E mo vo’ co lo sospetto

900

Travagliato

Farme stà.

SCENA VII

SCONCIGLIO sonanno lo tammuro nconsierto de sonature, li ballarine vestute turche, che portano lo palio mmiezo, e po MEO, e LELLA, che s’affacciano da lo barcone lloro, e TENZA, e NTREANA a la fenesta soja.

SCONCIGLIO

Todos todos a chi mi compagneros,

A chi se fa la fiestas;

Mo’ che sto palio s’have de chiantare,

905

Stordimmoce na mola a pazziare,

Addove si’ merluzzo? cca te chianta; (A chi porta lo palio.)

Perché vostè è l’Arfieros de la festa,

Sbrigateve mmaloras, cuerno cuerno.

MEO

È benuto lo palio, Lella, Lella,

910

Viene t’affaccia.

TENZELLA

Mamma curre curre,

Uh quanta gente viene vide, viene.

LELLA

Che nc’è zi Meo.

MEO

Se mette mo’ lo palio.

NTREANA

Ch’havimmo da vedè? si’ corza priesto,

A metterte nfenesta? trase dinto.

TENZELLA

915

Che d’haje arrasso sia

Manco pozzo vedere na pazzia.

NTREANA

Trase dinto te dico.

MEO

Ah Gnora, Gnora

Lassala sta a bedè la poverella.

No me la fa sperì; (che facce bella.)

SCONCIGLIO

920

Accossì state buono?

NTREANA

Mo’ mmo’ vene

Ch’hà da fa no servizio.

SCONCIGLIO

Uh Tenza nosta?

LELLA

Ntrea’ falle levare sto golio.

NTREANA

Comme vo’ la sia Lella; eh stamm’attiento

Pe quarche zannaria, vasciate ll’uocchie.

TENZELLA

925

Gnorsì mo’ le chiudimmo,

E co ll’ossa pezzella po vedimmo.

SCONCIGLIO

Eh mi segnor D. Meos, onde chiere

Che mettimmo los palios?

MEO

Mo’ mmo’ scenno,

Chisto scargea Tenzella, ed io me mpenno. (Sconciglio piglia lo palio, e l’arvolea passeanno.)

930

A lo palio d’Amore

Nnammorate sbardellate

Su corrite, che facite?

Chi lo vole, eccolo cca.

(Ah nennella pazziarella

935

Io te voglio guadagnà). (azzenna Tenzella.)

LELLA

Viva Nardullo viva, bravo, bravo.

SCONCIGLIO

Vaso la mano a ostè, sia Lella schiavo.

Mo’ se vede chi hà chiù core,

Chi la vence sta recatta,

940

E chi perde se lo gratta

Co di’ mano cca, e llà

(Voca, sia, che sarria

A sto scuoglio ntroppecà.)

NTREANA

Sia Le’ t’haggio da dire na parola.

LELLA

945

Mo’ scenno abbascio, viene.

NTREANA

Eh figlio’ vi’ che faje, attienne a ttene.

SCENA VIII

SCONCIGLIO, MEO abbascio, e TENZA a la fenesta.

TENZELLA

Ch’è squagliata a bon’ora, vi’ che susta

Perché no mmoglio Meo, non sa che fare

Pe fareme schiattare?

MEO

950

Addove si’ Nardullo?

SCONCIGLIO

Eccome ccane.

MEO

Damme sso palio, e tozzola ssa porta.

SCONCIGLIO

E c’havimmo da fa.

MEO

Voglio saglire

A mettere lo palio a sso barcone.

SCONCIGLIO

Y perché non lo miettes

955

A lo barcones tuios?

MEO

Ca no me piace,

Che d’è si’ fatto moccia, che buo’ mettere

L’assisa a le pennate?

SCONCIGLIO

Tu che d’aje?

Chi te scicca, che strille? mo’ lo metto

Porzì ncoppa na votta.

MEO

Dallo ccane.

SCONCIGLIO

960

Che boglio dà? na meoza, è affizio mio.

Mo’ saglio addo Ntreana, e nce lo chianto.

MEO

Tu vuo’ saglire?

SCONCIGLIO

Yo, che fosse ciunco?

MEO

Uh te te ca Sconciglio m’è resciuto.

SCONCIGLIO

Lo Sonciglio si’ ttune; oje Cartafauza,

965

No mme j guancianno, ca te perdo

Lo respetto; me siente?

TENZELLA

Ah maramene,

Ca chiste mo’ faranno accostiune.

MEO

E che buo’ che te rompa

La noce de lo cuollo, lazzarone?

SCONCIGLIO

970

E bù senza la palla;

Vi’ chi fa leva te? na mmummia secca,

Ca si faccio na lloffa te l’affoco.

MEO

A me na lloffa? oh potta doje? birbante,

Damme sto palio cca.

SCONCIGLIO

Non t’accostare

975

Ca te faccio no stuppolo.

SCENA IX

NTREANA, e LELLA abbascio, e li stisse.

NTREANA

Ch’è chesto?

LELLA

Ah janca me, ca chisse mo’ s’accidono

Aiutate, spartite

Curre Ntreana, e buie che nce facite? (Cca Ntreana, e Lella teneno Meo, e duje aute Sconciglio.)

NTREANA

Patro’ Mmeo ch’è breogna; vi’ che faje?

MEO

980

Lassame j Ntreana.

LELLA

Statte zitto.

SCONCIGLIO

Fatte a tenè guallecchia,

Ca si viene te stiro ssa pellecchia.

MEO

Oh mmalora lassateme.

LELLA

Sconciglio,

Vavattenne da lloco.

NTREANA

Scumpe mone. (a Sconciglio.)

MEO

985

Posa sto palio.

SCONCIGLIO

Schiatta,

Tanto ng’haje tu, quant’io a sta recatta.

SCENA X

FONZO, e li stisse.

FONZILLO

Che remmore nc’è lloco?

NTREANA

Uh Fonzo Fonzo

Acconcia st’arrauoglio.

FONZILLO

Che d’è stato?

SCONCIGLIO

Vo’ mettere lo palio addo Ntreana.

FONZILLO

990

E tu va mettencillo dalle gusto.

SCONCIGLIO

Nce lo vo’ mettere isso co malanno;

E chisto è affizio mio.

FONZILLO

Va nce lo saglie,

E fenite sta baja.

MEO

No nce saglire;

Ca te caccio sso ffecato cca mmiezo.

FONZILLO

995

Ah zi Meo, haje iodizio; e mo’ te pierde?

MEO

Ed isso mo’ vo’ vencere lo punto;

E nnanze non ce lasso sto mostaccio.

NTREANA

Venca da tene la prodenza, scumpe.

FONZILLO

Non guastammo la festa, e tu Nardullo,

1000

Damme sto palio, ca lo metto io.

MEO

Me scusa ostè, nce va l’anore mio.

NTREANA

Ncoppa la casa mia no nce lo voglio.

SCONCIGLIO

E io mo’ te lo nzippo a chisto scuoglio.

FONZILLO

Jammoncenne zi Meo, leva ssa baja.

1005

No mi’ ca pierde de connitione

A bolè contrastà co sto scauzone?

Chi cammina pe li spine,

S’hà da pognere, e stracciare,

Chesta è cosa che se sa.

MEO

1010

È lo vero accossì ba.

SCONCIGLIO

Dise bien, mosca saglià.

FONZILLO

Co schefienzie, e malantrine

No besogna havè, che fare.

FONZILLO - MEO

Perché t’hanno d’allordà.

SCONCIGLIO

1015

Vi’ che mmierdas vonno aulà?

SCENA XI

SCONCIGLIO, NTREANA, e LELLA.

SCONCIGLIO

Oh ca ll’haggio venciuta

LELLA

Haje fatta prova,

Va stirate lo vraccio.

SCONCIGLIO

Ma sia Lella,

Isso vo’ fa lo potta a ncioriareme,

Ed io non passo pe sto chirchio rutto.

NTREANA

1020

Lassalo j, sia Lella, sient’a mmene.

LELLA

Jammo dinto, e parlammo cchiù apposate.

SCONCIGLIO

Lo palio è puosto già, via su abballate. (cca se fa l’abballo a la torchesca, Sconciglio se torna a peglià lo tammurro, e sona, fenuto l’abballo dice:)

Figliule jatevenne a la falluca,

Ca mo’ venco, e le ccose nc’agghiustammo,

1025

E po co ste milorde nc’arrappammo.

SCENA XII

LELLA, e NTREANA.

LELLA

Sta mbroglia vole fare lo si Titta,

Stravestirse da schiavo pe basarme?

E di’ che benca, di’, ca no le scippo

Ll’uocchie co st’ogna?

NTREANA

Non farraje a chesto,

1030

C’haggio provisto a tutto; saglietenne.

Serrate da dereto, e s’io venesse

A tozzolare, non aprì.

LELLA

Non t’apro.

NTREANA

Mo’ voglio mette Ciulla stravestuta

A la portella mia reto la casa,

1035

Azzò venenno Titta, da llà esca,

E vedimmo chi fa meglio sta pesca.

LELLA

Guidela tu comme te pare meglio,

Aiuta chella scura negrecata.

NTREANA

È piso mio.

LELLA

Vide a che stella è nata.

1040

Orsù non è cchiù tiempo sta mmalanza;

Ciulla è biva, e sta cca; Titta ha mogliere,

Lella ca tu nce pienze, che ne spiere?

Core mio, che s’ha da fare?

Sto ppenzare che bo’ di’?

1045

Resorvimmoce via mo’.

Si non puoje havè chi vuoje;

Che te serve sto sperì?

Ama chillo, c’havè puo’.

SCENA XIII

TITTA da schiavo vennenno cauzette.

TITTA

O creo ca simm’a ttiempo, e che Ntreana

1050

Sta ddo Lella, ca nghiusa have la porta,

Mettimmoce a strellare

Pe fare l’affacciare.

Chi volir comprar calzetta,

E russetta a piattina,

1055

Tutta quanta rrobba fina

A bon prezzo mi donar

Su baisano via comprar.

Non ce compare nullo, a che ghiocammo?

Mettimmoce a sto pizzo, ed aspettammo.

SCENA XIV

CIULLA da zingara, e lo stisso.

CIULLA

1060

Ahie chi vo’ la palettella,

Nc’è lo spito, ed è polito,

Tenco cca la scummarella,

Cortesia ve voglio fa;

Chi se nzora, e bo’ accattà.

CIULLA - TITTA

1065

Chi volir &c. - Ahie chi vo’ &c.

CIULLA

Ecco llà Titta, ah negrame lo core

Che sbattere me fa; Cielo soccurzo.

Compar buongiorno.

TITTA

Chesta nce mancava, che bolir?

CIULLA

1070

Che d’avir co chesta cera?

Annevenar ventura.

TITTA

Andare, andare,

Ca ti star mariola.

CIULLA

N’è lo vero;

Io non so’ llatra, e manco tu si’ schiavo.

TITTA

(Oh bon’ora, cche sento) Ti star pazza?

CIULLA

1075

Non cagnare lenguaggio, ca te saccio.

TITTA

Che sapir? ti star fauza.

CIULLA

Tu si’ fauzo

Ca staje cca pe fa mbroglia,

O maro te, se chesta se scommoglia.

TITTA

(Tiemente c’hà li spirete sta zingara,

1080

Me potesse aiutà?) Su va decenno

Nnevineme la sciorta.

CIULLA

Me daie la cortesia.

TITTA

Te la dongo.

CIULLA

Damme sta mano, ed auza cca sta faccia.

TITTA

Veccola.

CIULLA

(Tradetore) siente ccane,

1085

Te vedo all’uocche ca si’ nnamorato;

Fust’amato no tiempo.

TITTA

E mo’?

CIULLA

Si’ odiato.

TITTA

Perché?

CIULLA

C’haje la mogliere.

TITTA

Lloco sgarre.

CIULLA

No sgarro; siente appriesso.

TITTA

Sto a sentire.

CIULLA

Te si’ bestuto Schiavo pe basare

1090

La fegliola, che amme, n’è lo vero?

TITTA

(Io rest’ammisso) comme tu lo ssaie?

CIULLA

Lo folletto, che tenco a chist’Aniello

Me lo ddice a l’arecchia.

TITTA

E mente è chesto

Comme, haie ditto ca io sonco nzorato,

1095

Si moglierema è morta?

CIULLA

Ed io te dico

Ca mogliereta è biva.

TITTA

È biva! comme?

CIULLA

Che d’è; te si’ cagnato de colore?

Che te spiace, ch’è biva.

TITTA

Ah porca, nfame?

CIULLA

Perché le dice chesto.

TITTA

Vasta, vasta.

1100

Ed è biva pe cierto?

CIULLA

È biva.

TITTA

A sciorte.

Accossì m’haje traduto? E già ch’è biva,

Pigliete chiste, e dimme addove stace.

CIULLA

Che ne vuo’ fa.

TITTA

Le voglio caccià ll’Arma.

CIULLA

Addonga la vuo’ morta.

TITTA

E zeffonnata.

CIULLA

1105

Stipate li denare, ca la scura

Pe contentarte venarrà no juorno,

Co tutto ca le si’ tanto nnemmico,

E te dirrà chello, che mo’ te dico.

Non si’ stracquo turco cano

1110

De volerme fa patire?

Vuo’ che mora, pe morire

So’ benuta eccome cca.

TITTA

(Oddio me pare de sentire Ciulla.)

CIULLA

Su che faie, stienne ssa mmano

1115

Te lo pietto scippa straccia

De sto core fa venaccia

Nzi’ che t’haie da sazià.

Aimmè lo core, ajuto.

TITTA

Uh poverella

O Ntreana, Ntreana?

SCENA XV

NTREANA, e li stisse.

NTREANA

Che nc’è Titta;

TITTA

1120

Aiuta chesta Zingara.

NTREANA

Maressa

Ch’è stato.

TITTA

È addebboluta;

Te dalle sto carrino, e di’ che torna,

Ca ll’haggio da parlare.

NTREANA

Tu mo’ ddo’ vaie.

TITTA

Me voglio j a spogliare.

NTREANA

1125

E Lella.

TITTA

Haggio cagnata penione.

Po te dico perché, lasseme ire.

CIULLA

E quanto sto a morire?

NTREANA

Figlia mia, che cos’è? che t’è socciesso?

CIULLA

Ah ca non pozzo, te llo ddico appriesso.

1130

Maritemo addo’ stace.

NTREANA

Se n’è ghiuto a spoglià!

CIULLA

T’ha ditto niente.

NTREANA

Vo’, che tuorne ca t’have da parlare,

E t’ha lasciato no carrino, sciala.

CIULLA

Sì cca scialo, ddov’è? Dammillo priesto.

1135

Saie perché l’ha lassato.

NTREANA

Perche?

CIULLA

Che me n’accatta solemato.

NTREANA

Non ce perdere tiempo, fa sta spesa,

E bi’ comme te truove; Ah maratene

Vi’ ca tu vaie mpazzia, si non ntienne,

1140

Susete, e ghiammoncenne.

CIULLA

Hoie morte, addove si’, che non mme siente,

Ca pe farme stentare, e cchiù patire,

Si’ fatta sorda, e no mme faie morire.

SCENA XVI

SCONCIGLIO, e TENZELLA.

SCONCIGLIO

Haggio ntiso, ca Titta sta mmojenato,

1145

No mmene a la recatta,

Si be’ nce manna la falluca soja;

Chesto me va cchiù mparo,

Pe guadagnà lo palio, ca sto cano

È no turco de Mare; e co raggione

1150

Me deva apprenzione.

TENZELLA

Mo’ che Mamma

St’attuorno a Ciulla pe la conzolare

Lassame ascì no poco a resciatare.

SCONCIGLIO

Tenzella.

TENZELLA

O si smargiasso tu cca staje?

SCONCIGLIO

A lo commanno tuio bannera mia.

TENZELLA

1155

Haje fenuto fa buglia, presentuso?

SCONCIGLIO

Ma si chella ranonchia scortecata

De Cartafauza me vo’ j fruscianno,

Ng’hà mancato tantillo, e le ncasava

Quatto gliommare ncapo, la schefice

1160

Isso voleva saglì a la Casa toja.

Pe mettere lo Palio.

TENZELLA

Che d’era?

M’arrobbava coll’uocchie, o me magnava.

SCONCIGLIO

E si chillo annascuso

Te lo mollava quarche pezzechillo,

1165

O jocava de ciampa a sto pedillo?

TENZELLA

E sì ca io so’ morta? no le deva

No muzzeco a lo naso.

SCONCIGLIO

Ca lloco sta lo ccaso,

Potea sgarrà la botta,

1170

E scagno dello naso, dive sotta.

TENZELLA

Va Zanno marotene,

Sempe co la pazzia; ma tu non saje,

Ca sto dint’a li guaje.

SCONCIGLIO

Perché bellezza.

TENZELLA

Ca mamma me vo’ dare a Cartafauza.

SCONCIGLIO

1175

Pecchesso lo Carnumma era ncocciato

De saglì ncoppa; Ed io bravo saputo,

Ca tell’haggio chiaruto. Eh statt’attiento;

Non te fa trasportà da mamma toja,

Ca ste becchie mmardette hanno pe uso.

1180

D’annegrecà le ffiglie; co pretesto

Ca le vonno dà pane pe campare,

Le danno n’uosso viecchio a spollecare.

TENZELLA

È lo vero, ma tu me faje paura,

Ca si’ troppo manisco, e furiuso,

1185

Vorria, che fusse doce cchiù de pasta,

Che no vvedisse troppo, e non trasisse

A li guaje de le femmene; m’haje ntiso,

Fegliulo finché manzo, ca si’ acciso.

SCONCIGLIO

Tenze’ no nnommenà troppo sto manzo,

1190

Ca la Carne de piecoro hà no fieto;

Vasta, si non so’ manzo, so’ cojeto.

TENZELLA

Quanno faje accossì starrimmo buono,

E te vorraggio bene

De chillo muodo, che tu vuoje a mmene.

SCONCIGLIO

1195

Pe l’Affecchienzia ntanto duorme, duorme.

Ma tu st’attiento pe lo viecchio.

TENZELLA

Guarda non è focile pe tenè sta scarda.

Speretillo de sto core

Pe tte sulo tenc’affetto.

SCONCIGLIO

1200

Fecatiello de sto pietto

Lo centimmolo d’amore

Schitto tu me faje votà.

TENZELLA

Fruscia via, non te stracquà.

SCONCIGLIO

Tu figliola si’ la mola,

1205

Che me fragne nott’è ghiuorno.

TENZELLA

Tu figliulo si’ lo mulo

Che sta mola vuote attuorno.

SCONCIGLIO

Fragne bona sta farina.

TENZELLA

Arre trotta, su cammina.

SCONCIGLIO

1210

Nché lo grano è mmacenato

Bella pizza voglio fa.

TENZELLA

Quanno po te si’ stracquato,

Quant’alizze vuo’ jettà.