| | |
| | |
| | Lo simmele, Napole, [s.e.], 1724 |
| | a cura di Paologiovanni Maione |
| |
| |
| |
|
| |
| | Lo simmele |
| |
| |
| | Commeddeja de lo Segnore Bernardo Saddumene da recetarese a lo Teatro nuovo de Montecalvario nchist’Anno 1724. |
| | Addedecata all’Ammenentissemo Segnore lo Si Cardenale Michele Federico d’Althann Vicerrè, Luocotenente, e Capitanio Generale de sto Regno de Napole MDCCXXIV. |
| | Se venneno à Toleto a la Lebbraria de Parrino. |
| |
| |
| | Ammenentissemo Segnore. |
| |
| | No Ciunco cammenà senza stanfelle |
| | Pò maje? gnornone. E belejà na Nave, |
| | Pò senza viento? manco. E senza Trave |
| | Na Casa vecchia reje? vò le pontelle. |
| |
| | Jammo cchiù ncoppa mò. Porzì le Stelle |
| | Comme sarriano? negre comm’a schiave, |
| | Si maje lo Sole, co lo lumme, c’have, |
| | No le desse li lampe, e le shiammelle. |
| |
| | Ciunco, Vasciello, Stella, e ’Casa sfatta; |
| | Co sto Triato nuovo, e le ’parole |
| | De stà Commeddeja vanno parapatta. |
| |
| | Mà Vuje, Segno’, benigno a quatto sole |
| | Le site, azzò la mmideja abbotta, e schiatta, |
| | Trave, Stanfelle, Viento mpoppa, e Sole. |
| |
| | Umeliss. e obbrecatiss. Servetore |
| | Jennaro Donatiello. |
| |
| | A chi vo’ leggere, ò sentire la Commedeja. |
| | Acciò che pozzate compatire chelle cose, che fuorze nò ve jarranno a genio, sentenno sta burletta: Avite da sapere ca li Patrune de ssò Teatro nuovo; primma de lo Mese de Giugno non se sonnavano manco de poterence fa nchist’Anno Commedeje nmuseca; consideranno, ca manco mediocre se sarria potuto aonire na Compagnia, dapo’ che s’erano cò tanto stiento proviste duj’aute Teatre, e nò nc’erano restate aute, che cierte scarte; Mà perche ncè fuje, chi voze cò chiste arresecare li denare suoje, s’è fatta priesto priesto ncopp’à lloro stà bagattella, che bide; e perche vorria, che la leggisse, e bedisse cò gusto, te voglio fa sapere, ca sta favoletta e na specia d’artificejo a’duje cape, che se soleno fa de stò muodo, quanno nc’è n’abbonnanzeja de porva, pe dare gusto a chi le bede, e’sente. Lo primmo capo è n’arresemmegliamiento, che hà nò cierto galantommo chiammato Masillo cò n’ommo ordenario chiammato Cuoppo, lo quale è pigliato pè Masillo da tutte, fora che da Luccio, che lo canosceva. E ll’auto è L’Ammore stravagante de Palomma, che vo’ bene egualmente a duje, e pe lo tropp’ammore, che le porta non se sà’resorvere, de pigliaresenn’uno, e lassà ll’auto: E accossì perche chille se nne ridono de st’ammore; commo perche Masillo lassaje a Napole na Sore chiammata Teresella: no debbeto de dociente docate cò Nardillo viecchio: nò creddeto de ciente cò lo figlio D. Peppo; e dette parola de Matremonio a Marzia; nnè nasceno chille abbenemiente, che vedarraje, si la viene a sentire, ca fuorze non ncè perdarraje li denare tuoje; e te so’ cuoco. |
| |
| | Le perzune, che cantano, e recetano. |
| |
| | PALOMMA: Figlia de Marzia vedola nnammorata de D. Peppo, e Luccio |
| | La Segnora Jacomina Ferrari. |
| | TERESELLA Sore de Masillo, che ama D. Peppo |
| | La Segnora Laura Cesarini. |
| | D. PEPPO nnammorato de Palomma, debetore de Masillo de ciento ducate. |
| | LUCCIO nnammorato de Palomma |
| | Lo Segnore Felippo Giorgi. |
| | MASILLO Frate de Teresella |
| | Lo Segnore Giuseppe Fiorillo. |
| | NARDILLO viecchio nnammorato de Palomma, credetore de Masillo de 200. ducate, e Patre de D. Peppo. |
| | Lo Segnore Jacovo d’Ambrosio. |
| | MARZIA vedola vecchia, destenata Mogliere de Masillo |
| | Lo Segnore Dommineco de la Corte. |
| | RECHIPPO Garzone de Cafeo |
| | La Segnora Antonia Cermenati. |
| | CUOPPO Ommo diota simmele a Masillo. |
| | Lo stisso Segnore Giuseppe Fiorillo. |
| |
| |
| | La Scena se fegne a lo llargo de lo Castiello. |
| |
| |
| | La Museca è de lo Segnore |
| | Antonio Orefece. |
| |
| |
| |
| |
